اسلام آباد – 07 – سيپٽمبر (اي پي پي) نگران وزيراعظم انوارالحق ڪاڪڙ چيو آهي ته پاڪستان جي معيشت ۾ پرڏيهي پاڪستانين جو اربين جو پرڏيهي ناڻو مثبت ڪردار ادا ڪري رهيو آهي، پرڏيهي پاڪستاني کي درپيش مسئلن جي حل لاءِ هر ممڪن قدم کنيا وڃن. وزيراعظم آفيس جي ميڊيا ونگ پاران جاري بيان موجب اهڙن خيالن جو اظهار هن وزيراعظم جي پرڏيهي پاڪستانين بابت خاص معاون جواد سهراب ملڪ سان ملاقات دوران ڪيو. ملاقات ۾ اوورسيز پاڪستانيز واري وزارت جي معاملن تي خيالن جي ڏي وٺ ڪئي وئي. نگران وزيراعظم چيو ته پرڏيهي پاڪستاني اسان جو قيمتي اثاثو آهن جن جي ڀلائي حڪومت جي اولين ترجيح آهي، پاڪستان جي معيشت ۾ پرڏيهي پاڪستانين جو اربين رپين جو پرڏيهي ناڻو مثبت ڪردار ادا ڪري رهيو آهي. هن هدايت ڪئي ته اوورسيز پاڪستانيز کي درپيش مسئلن جي حل لاءِ هر ممڪن قدم کنيا وڃن.
