اسلام آباد۔3اپریل(اے پی پی)قومی اسمبلی اچ وزیراعظم دے خلاف تحریک عدم اعتماد خلاف آئین قرار ݙیندے آئین دے آرٹیکل 5 ہک دے تحت مسترد کرݙتی ڳئی۔ اجلاس اچ ڈپٹی سپیکر قاسم خان سوری وقفہ سوالاں اچ وفاقی وزیر قانون و اطلاعات و نشریات چوہدری فواد حسین دا موقف سݨݨ توں بعد رولنگ ݙتی جو وزیراعظم دے خلاف عدم اعتماد دی تحریک آئین و قانون دے مطابق ہووݨی چاہیدی اے، اے تحریک آئین دے آرٹیکل 5 ہک دے خلاف اتے میں اے تحریک مسترد کرینداں۔ وفاقی وزیر قانون و اطلاعات و نشریات چوہدری فواد حسین اعتراض کیتے جو آئین دے آرٹیکل 95 دے تحت عدم اعتماد دی تحریک جمہوری حق اے ٻھل آئین دے آرٹیکل 5 ہک اچ ریاست نال وفاداری ہر شہری دی بنیادی ذمہ داری اے، 7 مارچ کوں ساݙے سفیر کوں سرکاری ملاقات کیتے سݙایا ڳئے اتے ݙسایا ڳئے جو وزیراعظم دے خلاف عدم اعتماد دی تحریک آوݨی اے، حالانکہ اوں ویلھے تئیں ملک اچ کوئی وی تحریک کائنا آئی ہئی۔ سفیر کوں آکھیا ڳئے جو پاکستان نال تعلقات ایں عدم اعتماد دی کامیابی نال مشروط ہین جیکر کامیابی نہ تھئی تاں سخت نتیجے ٻھڳتݨے ہوسن، ایندے بعد عدم اعتماد دی تحریک وی آڳئی، ساری اپوزیشن وی کٹھی تھئی اتے ساݙے ارکان سودھا اتحادیاں دے وی ضمیر کٹھے ڄاڳ ڳین۔ وفاقی وزیر آکھیا جو کیا 22 کروڑ دی ریاست اتنی کمزور اے جو کوئی ملک ایویں مداخلت کرے، کیا آرٹیکل 5 دی خلاف ورزی نئیں؟ کیا پاکستان دے عوام کوئی کٹھ پتلیاں، غلام یا بھکاری ہین؟ جیکر اساں ہم غیرت مند قوم ہیں تاں اے تماشہ نئیں چل سڳدا، ایندے تے سپیکر رولنڳ ݙیون۔ ݙپٹی سپیکر رولنگ ݙتی جو لڳدے کہ عدم اعتماد دی تحریک دے پچھو غیر ملکی سازش اے تہوں ایں تحریک کوں مسترد کریندے ہیں۔ انہاں قومی اسمبلی دا اجلاس غیر معینہ مدت کیتے ملتوی کر ݙتے۔
