اسلام آباد۔15فروری (اے پی پی) وزیراعظم محمد شہباز شریف آکھیا جو پاکستان تے موسمیاتی تبدیلیاں دے اثرات، پاݨی، توانائی اتے غذائی تحفظ جیھے چیلنجز نال نبڑݨ کیتے فصلاں دی ودھ پیداوار اتے خشک سالی دے خلاف مزاحمت کرݨ آلی فصلاں دی قسماں تے تحقیق بارے انٹرنیشنل اٹامک انرجی ایجنسی(آئی اے ای اے )نال ودھ تعاون دی لوڑھ اے۔ آئی اے ای اے دے ڈائریکٹرجنرل ماحولیاتی مسائل نال نبڑݨ کیتے جوہری ٹیکنالوجی دے استعمال کوں ودھاوݨ دی لوڑھ تے اتفاق کیتا۔بدھ کوں وزیراعظم آفس دے میڈیا ونگ توں جاری بیان موجب وزیراعظم محمد شہباز شریف نال انٹرنیشنل اٹامک انرجی ایجنسی دے ڈائریکٹر جنرل رافیل ماریانو گروسی ملاقات کیتی۔ ایں موقع تے وزیراعظم ڈائریکٹر جنرل دا خیرمقدم کریندیں ہوئیں آئی اے ای اے اتے پاکستان وچال صحت، زراعت، صنعت، جوہری ادویات اتے بجلی دی پیداوار دے شعبیاں اچ جاری تعاون دی تعریف کیتی۔ وزیراعظم ڈائریکٹر جنرل گروسی کوں پاکستان اٹامک انرجی کمیشن (پی اے ای سی) ولوں 19 کینسر ہسپتالاں دے اہم کردار بارے بریفنگ ݙتی جیڑھی پاکستان اچ کینسر دے علاج اچ نشابر کردار نبھیندے پن۔ ڈائریکٹر جنرل مختلف شعبیاں اچ نیوکلیئر ایپلی کیشنز اچ پاکستان دی مہارت دا اعتراف کریندیں ہوئیں آکھیا جو پاکستان ایجنسی دے کم اچ تعاون کیتے اہم کردار نبھا سڳدے جئیں اچ کینسر دے علاج کیتے ’’امید کی کرن‘‘ دا اقدام وی شامل اے۔
