اسلام آباد۔25ستمبر(اے پی پی)پاکستان تنازعات توں پاک جگ دی خواہش کریندے اقوام متحدہ تے زور ڈتے جو او امن و سلامتی سودھا ترقی دے ہکو سویں مواقع کیتے کثیر الجہتی اشتراکیت دی حکمت عملی ڈیوے۔ وزیر اعظم عمران خان آکھیے جو پاکستان ریاست مدینہ دی بنیاد تے لوکاں دی فلاح،غربت مکاونڑاتے سماجی و معاشرتی ترقی دی پالیسی تے ٹردا پئے، کرونااتے موسمیاتی تبدیلی نال نبڑن کیتے ساڈی کامیاب حکمت عملی اج پورے جگ کیتے مثال مسمجھی ویندی پئی اے،اقوام عالم کوں مسلہ کشمیر، افغانستان اچ پائیدار امن اتے فلسطین دے ڈو ریاستی حل کیتے اگو تے آونڑا چاہیدے،اسلامو فوبیاتے فوری رد عمل ڈکھاونڑ دی لوڑھ اے۔اقوام متحدہ دی جنرل اسمبلی دے ورچوئل اجلاس نال اپنڑے خطاب اچ وزیراعظم عمران خان آکھیے جومیڈی حکومت دی پالیسیاں د ا مرکز ریاست مدینہ اے جیندا ایجنڈاعوام، خاص کر غریباں دی فلاح اے،حکومت ملک دی چنگائی کیتے مربوط کوششاں کریندی پئی اے جیندے مثبت نتیجے نکلدے پین۔ انہاں کرونا نال نبڑن کیتے کامیاب حکمت عملی دا ڈسیندے آکھیے جو کروناتے پاکستان سب توں نویکلی پالیسی بنڑائی اے جیڑھی کامیاب تھئی اے، سمارٹ لاک ڈاون دے چنگے نتیجے نکلین، اساں ناصرف غریب اتے محروم طبقے کوں مالی مشکلات توں بچائے بھل کرونا سودھا معاشی مسلیاں نال وی نبڑیے ہیں،اج ایں وبا تے قابو پاونڑ اچ پاکستان سب توں اگو اے۔انہاں آکھیے جو ترقی پذیر ملکاں کوں کرونا توں نبڑن کیتے مدد،ریلیف اتے بحالی دے اقدامات دی لوڑھ اے،قرضیاں اچ ریلیف کیتے وی تیکھے کم کرنڑا ہوسی۔انہاں موسمیاتی تبدیلیاں دے شدید اثرات دا ذکر کریندے توجہ ڈیوائی جو اے عالمی مسلہ اے بھل پاکستان ایکوں سمجھدے ہوئے سب توں پہلے رد عمل ڈتے جینداثبوت ڈاہ ارب درخت منصوبہ اے۔انہاں مسلہ کشمیر کوں خطے دے امن کیتے لازم قرار ڈیندے آکھیے جو مسلہ کشمیر دے حل تئیں خطے اچ امن نئیں تھی سگدا،بھارت کشمیر اچ عالمی قوانین کوں ہک پاسے سٹ ڈتے، غیر قانونی قبضہ ،نوں لکھ فوج مسلط کر تے اسی لکھ کشمیریاں دا محاصرہ اصل اچ انہاں دی سنجانڑ کھسنڑ اتے کئی ڈھاکیاں توں حق خود ارادیت کوں لتاڑنڑ دی کوشش ہین، بھارت کشمیر اچ اپنڑے مظالم توں توجہ ہٹاونڑکیتے پاکستان دے خلاف جارحانہ عزائم رکھیندے،سرحدی خلاف ورزیاں اتے فالس فلیگ آپریشن ایندا ثبوت اے ،ایں رویے تے پاکستان مسلسل جگ کوں چتیندا آندے جیکر ایں جوہری ماحول اچ بھارت کہیں جارحیت دی بھل کیتی تاں جگ جانڑ گھنے جو پاکستان اپنڑی سالمیت دی بقا کیتے آخری ساہ تئیں جنگ لڑسی،چنگاں ہوسی جو اقوام متحدہ بھارت کوں مقبوضہ کشمیر اچ جنگی جرائم توں ڈکے نتاں خطے دی وگڑدی صورتحال دے اثرات پورے جگ تے پئے سگدن۔
