بيجنگ – 18 – آڪٽوبر (اي پي پي) نگران وزيراعظم انوارالحق ڪاڪڙ بيلٽ اينڊ روڊ انيشي ايٽو جي ڀرپور حمايت جو ورجاءُ ڪندي چيو آهي ته پاڪستان سي پيڪ جي اعليٰ معيار جي ترقي جي نئين مرحلي ۾ چين سان مختلف شعبن ۾ رابطي ۽ تعاون کي مضبوط بڻائيندو، غذائي تحفظ ۽ زراعت جهڙن شعبن ۾ نئين ٽيڪنالاجي متعارف ڪرائي ويندي، سڌارن، غربت جي خاتمي، تحقيق ۽ ترقي، انفارميشن ٽيڪنالاجي ۽ ٻين شعبن ۾ چين جي ڪاميابين مان فائدو کڻنداسين، چيني ڪاروباري ادارن جي سيڙپڪاري جي حوصلا افزائي جي لاءِ پاڪستان خصوصي سيڙپڪاري سهولت ڪائونسل کي وڌيڪ بهتر بڻايو ويندو. هن اهڙن خيالن جو اظهار چيني ميڊيا سان ڳالهائيندي ڪيو. نگران وزيراعظم چيو ته پاڪستان چين جي صدر شي جن پنگ جي بيلٽ اينڊ روڊ انيشي ايٽو (بي آر آئي) کي ساراهي ٿو ۽ ان جي ڀرپور حمايت ڪري ٿو، پاڪستان چين جي ترقي جي تجربي مان فائدو کڻڻ جو خواهشمند آهي. نگران وزيراعظم چيو ته پاڪستان بي آر آئي جي عظيم ويزن کي قدر جي نگاهه سان ڏسي ٿو جيڪو اقتصادي ترقي جي ذريعي امن ۽ خوشحالي آڻڻ جو مظهر آهي، پاڪستاني وفد جنهن ۾ اقتصادي، صنعتي، سيڪيورٽي ۽ ٻين شعبن جا اعليٰ عملدار شامل آهن، دوري جي دوران چيني عملدارن، ٿنڪ ٽينڪس ۽ ميڊيا سان ٻطرفي ڳالهه ٻولهه جو منتظر هو. بي آر آئي تحت چين پاڪستان اقتصادي لنگهه (سي پيڪ) جي مثالي منصوبي جي اهميت تي زور ڏيندي نگران وزيراعظم چيو ته سي پيڪ سان وڏي ترقي ٿي آهي ۽ سندس اباڻي صوبي بلوچستان جي لاءِ ترقي جا روشن امڪان پيدا ٿيا آهن. نگران وزيراعظم چيو ته پاڪستان سي پيڪ جي اعليٰ معيار جي ترقي جي نئين مرحلي ۾ چين سان رابطي ۽ تعاون کي وڌيڪ مضبوط بڻائيندو، چين جي مدد سان غذائي تحفظ ۽ زراعت جهڙن شعبن ۾ نئين ٽيڪنالاجي متعارف ڪرائيندو ۽ ڪاروباري ادارن جي حوصلا افزائي ڪندو ته جيئن اهي واپار کي فروغ ڏئي سگهن ۽ چين سان ٻطرفي تعاون مان فائدو کڻي سگهن. هن چيو ته پاڪستان خصوصي سيڙپڪاري سهولت ڪائونسل کي وڌيڪ بهتر بڻائيندو ته جيئن چيني ڪاروباري ادارن جي کاڻين جي کوٽائي، زراعت ۽ انفارميشن ٽيڪنالاجي جهڙن شعبن ۾ سيڙپڪاري جي لاءِ حوصلا افزائي ۽ انهن کي سهولت فراهم ڪري سگهجي ۽ پاڪستان ۾ ڪم ڪندڙ چيني ڪاروباري سرگرمين جي لاءِ سازگار حالتون پيدا ٿين. نگران وزيراعظم چيو ته پاڪستان چيني شهرين جي حفاظت کي تمام گهڻي اهميت ڏي ٿو ۽ چيني شهرين جي لاءِ حفاظتي طريقيڪار کي وڌيڪ بهتر بڻائڻ جي لاءِ پرعزم آهي، پاڪستان ۾ چيني شهرين ۽ ادارن جي تحفظ کي يقيني بڻائڻ جي لاءِ هر ممڪن قدم کنيا پيا وڃن. نگران وزيراعظم ٻنهي ملڪن جي عوام پاران هڪ ٻئي جي زبان ۽ ثقافت بابت ڄاڻڻ ۽ دوستاڻي لاڳاپن کي وڌيڪ مضبوط بڻائڻ جي اميد جو اظهار ڪندي چيو ته پاڪستان چين سان دوستي کي قدر جي نگاهه سان ڏسي ٿو ۽ ان ڳالهه تي يقين رکي ٿو ته چين سان تعاون موقعن سان ڀرپور آهي. نگران وزيراعظم چيو ته پاڪستان سڌارن، ترقي، غربت جي خاتمي، تحقيق ۽ ترقي، انفارميشن ٽيڪنالاجي، زراعت ۽ ٻين شعبن ۾ چين جي ڪاميابين مان فائدو کڻندو ۽ چين سان تعاون تي ٻڌل حصيداري کي وڌيڪ مضبوط بڻائڻ جي لاءِ پرعزم آهي. نگران وزيراعظم چين جي صدر شي جن پنگ جي عالمي ترقي جي قدمن، عالمي سيڪيورٽي جي قدمن ۽ عالمي تهذيب بابت قدمن کي ساراهيندي چيو ته اهو دنيا کي درپيش پيچيده عالمي چئلينجن ۽ مسئلن کي منهن ڏيڻ جي لاءِ طريقيڪار ۽ اهم محرڪ آهي.
