اسلام آباد۔3اکتوبر (اے پی پی) وفاقی وزیر خزانہ تے محصولات سینیٹر محمد اورنگزیب آکھیا جو پاک ڈنمارک ایم او یو نال ݙوہیں ملکاں وچال تعاون کوں ٻیا ودھاوݨ اچ مدد ملسی، معاہدہ معاشی ترقی دے نال نال ماحولیات دے تحفظ کیتے وی اہم کردار ادا کریسی۔ اے ڳالھیں انہاں خمیس کوں اے پی ایم ٹرمینلز دے چیف ایگزیکٹو آفیسر کیتھ سویڈسن نال ورچوئل ملاقات اچ آکھی۔ ایں موقع تے وزیر بحری امور قیصر احمد شیخ، ڈنمارک دے سفیر جیکب لینولف، چیئرمین ایف بی آر اتے وزارت خزانہ اتے وزارت بحری امور دے سینئر افسروی موجود ہن۔ ملاقات دا محور ݙوہیں ملکاں وچال مفاہمت دی یادداشت دے بعد دی حکمت عملی تے غور کرݨ ہئی جیڑھا جو ہک ݙینھ پہلے پاکستان اتے ڈنمارک وچال تھیا ہئی۔ ایں یادداشت دا مقصد پاکستان اچ معیار زندگی کوں بہتر کرݨ اتے پائیدار معاشی ترقی کوں تیز کرݨ کیتے سرکاری تے نجی سانجھے داری دے تحت ماحول دوست تے پائیدار سرمایہ کاری کوں ودھاوݨ اے۔ وزیر خزانہ پاکستان دی معیشت دی پائیدار ترقی کیتے ڈنمارک دی حکومت اتے اے پی ایم ٹرمینلز دے کردار دی تعریف کیتی۔
