اسلام آباد – 20 – مارچ (اي پي پي) وزيراعظم محمد شهباز شريف ملڪي سرحدن کي دهشتگردي جي خلاف ريڊ لائين قرار ڏيندي چيو آهي ته سرحد پار کان ٿيندڙ دهشتگردي کي وڌيڪ برداشت نه ڪيو ويندو، پاڙيسري ملڪ جي سرزمين دهشتگردي جي لاءِ استعمال نه ٿيڻ گهرجي، پاڙيسري ملڪ اسان سان گڏجي ويهن ۽ دهشتگردي جي خاتمي لاءِ حڪمت عملي تيار ڪئي وڃي، معيشت کي مستحڪم بڻائڻ ۽ قرضن مان ڇوٽڪارو حاصل ڪرڻو آهي، ميثاق معيشت سان گڏ ميثاق يڪجهتي کي پڻ اختيار ڪرڻو پوندو، 2400 ارب رپين جي اوڳاڙين جا معاملا عدالتن ۾ يا ٽربيونلز ۾ ٻڌڻي هيٺ آهن، چيف جسٽس نوٽيس وٺي ميرٽ تي انهن جو فيصلو ڪرائي، ايف بي آر کي 100 سيڪڙو ڊيجيٽائيز ڪيو ويندو، جيڪي ماڻهو ٽيڪس نه ٿا ڏين انهن کي ٽيڪس دائري ۾ آڻينداسين، حڪومتي خرچ گهٽ ڪرڻ جي لاءِ ڪميٽي قائم ڪئي وئي آهي، بجلي ۽ گئس جي چوري جو مڪمل خاتمو ڪنداسين، وفاق ۽ صوبن کي گڏجي چئلينجن کي منهن ڏيڻو پوندو. اهڙن خيالن جو اظهار وزيراعظم محمد شهباز شريف وفاقي ڪابينا جي اجلاس ۾ ڳالهائيندي ڪيو. وزيراعظم شهباز شريف چيو ته وفاقي ڪابينا جو هي پهريون باقاعده اجلاس آهي جنهن ۾ سمورن وفاقي وزيرن ۽ سرڪاري آفيسرن کي ڀليڪار چوان ٿو. اميد آهي ته هي ڪابينا پنهنجي ڪارڪردگي ۽ ذميواري جي حوالي سان پاڪستان جي عوام جي اعتماد تي پورو لهندي. وزيراعظم چيو ته سڀ کان پهرين اسان پنهنجي شهيدن ۽ انهن جي عظيم والدين ۽ گهرڀاتين کي خراج عقيدت پيش ڪريون ٿا جن جي فرزندن جرئت ۽ بهادري سان دهشتگردن جو مقابلو ڪيو ۽ سمورن دهشتگردن کي جهنم واصل ڪيو ۽ انهن پاڻ شهادت ماڻي، ان کان وڏو وطن سان والهاڻي محبت، قرباني ۽ ايثار جو ڪو مثال نه ٿو ڏئي سگهجي. وزيراعظم چيو ته ملڪ ۾ 15، 20 سال اڳ دهشتگردي ڪنڌ کنيو هو پر عظيم قربانين جي نتيجي ۾ ان جو مڪمل طور تي خاتمو ڪيو ويو، موجوده دور ۾ دنيا ۾ ان جو ٻيو ڪو مثال نه ٿو ملي، پاڪ فوج جي جوانن جي وطن سان والهاڻي محبت انمول آهي. اٽڪل 70، 80 هزار پاڪستانين پنهنجي جانين جا نذرانا پيش ڪيا جن ۾ پاڪ فوج جا آفيسر، جوان، پوليس، قانون لاڳو ڪندڙ ادارن جا اهلڪار ۽ آفيسر ۽ انهن جا گهرڀاتي ۽ چئني صوبن ۾ رهندڙ عام پاڪستاني ڊاڪٽرز، شاگرد، استاد، انجنيئرز، وڪيل سڀ شامل آهن. وزيراعظم چيو ته دهشتگردي جي خاتمي جي لاءِ قوم عظيم قربانيون ڏنيون آهن، بدقسمتي سان ڪجهه سال اڳ ٻيهر دهشتگردي ڪنڌ کنيو، ان جي سببن ۾ هن وقت نه ٿا وڃڻ چاهيون پر ايتري عظيم قربانين کانپوءِ بي پناهه توانائيون ۽ وسيلا خرچ ڪرڻ کانپوءِ ان دهشتگردي جو واپس اچڻ ڪنهن الميي کان گهٽ نه آهي، ٻيهر انهن کي ڪچلڻ جي لاءِ اسان جا هي شهيد ۽ غازي حياتي تِري تي رکي انهن جو مقابلو ڪري رهيا آهن. ڪجهه ڏينهن اڳ ليفٽيننٽ ڪرنل سيد ڪاشف شهيد ۽ ڪيپٽن احمد بدر شهيد جي والدين ۽ گهرڀاتين سان ملڻ ويس، يقين ڪريو انهن جي حوصلي منهنجو ايمان تازو ڪري ڇڏيو، ٻنهي جي والدين جا حوصلا انتهائي بلند هئا. ڪيپٽن احمد بدر جو والد پاڻ به رٽائرڊ فوجي آفيسر آهي، هن چيو ته منهنجو هڪ ئي پٽ هو، چار ڀينرن جو اڪيلو ڀاءُ هو، الله هڪ پٽ ڏنو اها ان جي امانت هئي ان واپس وٺي ڇڏي آئون ان جي رضا تي راضي آهيان پر منهنجي پٽ وطن جي لاءِ عظيم قرباني ڏني آهي ان تي تمام گهڻو فخر آهي. شهيدن جي والدين وزيراعظم کي چيو ته انهن دهشتگردن جو مڪمل خاتمو ٿيڻ گهرجي، مون انهن کي يقين ڏياريو ته پاڪستان حڪومت ۽ پاڪ فوج گڏجي ان جو خاتمو ڪرڻ جو پورو عزم رکن ٿا ۽ انهن جو خاتمو ڪيو ويندو. وزيراعظم چيو ته مون انهن کي يقين ڏياريو ته سرحد پار کان جيڪا دهشتگردي ٿي رهي آهي ان کي وڌيڪ برداشت نه ٿا ڪري سگهون. پاڪستان جون سرحدون دهشتگردي خلاف ريڊ لائين آهن، پاڙيسري ملڪن سان امن جي ماحول ۾ رهڻ چاهيون ٿا، واپار، ڪاروبار ۽ گڏيل لاڳاپن کي فروغ ڏيڻ چاهيون ٿا پر بدقسمتي سان پاڙيسري ملڪ جي سرزمين دهشتگردي جي لاءِ استعمال ٿيندي ته اهو برداشت جوڳو نه آهي. اهو واضح ڪرڻ چاهيان ٿو ته ڪنهن به طرح جي حالتن ۾ سرحد پار کان دهشتگردي کي برداشت نه ڪيو ويندو. پاڙيسري ملڪ اسان سان گڏجي ويهن ۽ حڪمت عملي تيار ڪن ۽ خلوص ۽ سنجيدگي سان دهشتگردي جي خاتمي لاءِ گڏجي ڪم ڪنداسين ته ان کان بهتر خطي ۾ امن قائم ڪرڻ ۽ غربت ۽ بيروزگاري جي خاتمي جي حڪمت عملي نه ٿي ٿي سگهي. وزيراعظم چيو ته مون کي اميد آهي ته ان حوالي سان پاڙيسري ملڪ جون اعليٰ اختياريون منهنجي ان مخلصاڻي تجويز تي غور ڪنديون ۽ گڏجي اسان انشاءَ الله خطي کي امن جو گهوارو بڻائينداسين. وزيراعظم چيو ته آءِ ايم ايف سان ڳالهه ٻولهه جي حوالي سان ناڻي وارو وزير ڪابينا کي اعتماد ۾ وٺندو، اڳوڻي حڪومت ملڪ کي ڏيوالپڻو ٿيڻ جي ويجهو ڪري ڇڏيو هو ان کي بچائڻ جي لاءِ اسان هتي سموريون گڏيل ڪوششون ڪيون. ان سان اسان کي سياسي نقصان ٿيو ته ان جو ملال نه آهي ۽ نه ئي هوندو ڇو ته رياست بچي وئي ته سياست به انشاءَ الله بچي ويندي، آءِ ايم ايف جي ٽيم ٻئي جائزي جي لاءِ پاڪستان جو دورو ڪيو، اڳتي به اسان کي هڪ نئين پروگرام جي ضرورت آهي. اسان کي معاشي بنياد کي بحال ڪرڻو آهي، ملڪ کي پيرن تي بيهارڻو آهي ۽ قرضن مان ڇوٽڪارو حاصل ڪرڻو آهي. هن فورم جي ذريعي پوري قوم کي يقين ڏياريان ٿو اڃا تائين جيترن به ڀائر ۽ دوست ملڪن جي سفيرن سان ملاقات ٿي آهي، واضح انداز ۾ انهن کي گذارش ڪئي ته اسان توهان سان زراعت، انفارميشن ٽيڪنالاجي ۽ معدنيات، صنعتي شعبي، ايڪسپورٽ زونز ۽ انڊسٽريل زون ۾ سيڙپڪاري جي لاءِ حڪمت عملي ٺاهي پيش ڪنداسين. 16 مهينن جي گذريل حڪومت ۾ به اسان ايس آئي ايف سي جي ذريعي ڪم ڪيو. نگران دور ۾ به ان تي ڪم ٿيو، اسان جي حڪومت نئين مينڊيٽ سان ان تي ڪم ڪندي، قرضن کي رول اوور ڪرائڻ ۽ وڌيڪ قرض وٺڻ ملڪ جي لاءِ نقصانڪار آهي. اسان جو اهو فيصلو آهي ته اسان ڪوشش ڪنداسين ته گهٽ کان گهٽ قرض وٺون ۽ آهستي آهستي قرضن مان ڇوٽڪارو حاصل ڪنداسين. ان جو واحد طريقو اهو آهي ته اسان ملڪ ۾ سيڙپڪاري کڻي اچون ۽ ملڪ جي ماحول کي سازگار بڻايون، سياسي ۽ معاشي ماحول کي بهتر بڻائڻ ۽ يڪجهتي پيدا ڪرڻ جي ڪوشش ڪريون، ان جي لاءِ ميثاق معيشت جي آڇ سان گڏوگڏ ميثاق يڪجهتي تي پڻ عمل ڪرڻ گهرجي. گڏجي پاڪستان کي ترقي جي منزل تي گامزن ڪنداسين. وزيراعظم چيو ته اسان جي 2400 ارب رپين جي اوڳاڙين جا معاملا عدالتن ۾ يا ٽربيونلز ۾ ٻڌڻي هيٺ آهن. قانون واري وزير کي چيو آهي ته هو ٽربيونلز کي چوي ته جلد انهن جو فيصلو ڪن. چيف جسٽس کي به گذارش آهي ته هو سمورين هاءِ ڪورٽس کي هدايت ڪري ته انهن ڪيسز جو جلد کان جلد ميرٽ تي فيصلو ڪيو وڃي. وزيراعظم چيو ته ايف بي آر کي 100 سيڪڙو ڊيجيٽائيز ڪرڻ جي لاءِ ۽ انساني مداخلت ختم ڪرڻ جي لاءِ ڪالهه آخري اجلاس ڪري ورتو آهي، 8 اپريل تي عالمي معيار جي ڪنسلٽنٽس جي بڊز اچي وينديون ۽ اهي اهڙا ڪنسلٽنٽس هوندا جن کي اسان جي زميني حقيقتن جو ادراڪ هجڻ گهرجي ۽ انهن وٽ عالمي معيار جو تجربو هجڻ گهرجي. 8 اپريل تي بڊز کلنديون اپريل جي ٽئين چوٿين هفتي ۾ ڪنسلٽنٽس مقرر ٿي ويندا جنهن سان گڏ ايف بي آر جي ڊيجيٽائيزيشن جو عمل تيزي سان شروع ٿي ويندو. وزيراعظم چيو ته قوم سان واعدو ڪريان ٿو ته ان عظيم ذميواري کي نڀائڻ جي لاءِ ناڻي واري وزير ۽ ٻين ڌرين سان گڏجي جلد کان جلد ان پروگرام کي مڪمل ڪنداسين. وزيراعظم چيو ته مافياز اربين کربين رپيا کائيندا پيا وڃن ۽ ٻاهرئين ملڪن ۾ جمع ڪرائي رهيا آهن، انهن کان ڪير پڇڻ وارو نه آهي، ان سلسلي ۾ ناڻي واري وزير ۽ ايف بي آر چيئرمين کي هدايت ڪئي آهي ته اهي اهڙن فرض شناس آفيسرن جون فهرستون ٺاهين، انهن جو قوم آڏو اعتراف ڪيو ويندو ۽ جن به ڀيانڪ عمل ۾ حصو ورتو انهن جي خلاف سخت ڪارروائي ٿيندي ۽ انهن سان ڪا رعايت نه ٿيندي. سالياني بنيادن تي وصولي ٿيڻ گهرجي. ان سان اسان جي خزاني ۾ اضافو ٿيندو ۽ قرضن ۾ گهٽتائي ايندي ويندي. وزيراعظم چيو ته حڪومتي خرچ گهٽ ڪرڻ جي لاءِ ڪميٽي قائم ڪئي وئي آهي. ڪيترائي ادارا اهڙا آهن جن جي ضرورت نه آهي، 18 هين ترميم ۾ ڪجهه ادارا صوبن کي منتقل ٿيا آهن ڪجهه رڪيل آهن انهن کي به صوبن جي حوالي ڪيو ويندو. ان کانسواءِ جتي جتي به خرچن ۾ گهٽتائي آڻي سگهجي ٿي اسان ڪميٽي جي سفارشن تي عمل ڪري گهٽتائي آڻينداسين. وزيراعظم چيو ته ملڪ ۾ ساليانو چار کان پنج سئو ارب رپين جي بجلي چوري ٿي رهي آهي، اهڙي طرح گئس به چوري ٿي رهي آهي، پيٽروليم ۽ پاور ڊويزن جي وزيرن کي هدايت ڪئي آهي ته اهي بجلي ۽ گئس جي چوري جي مڪمل خاتمي لاءِ پلان پيش ڪن. ان سلسلي ۾ ڪا سفارش ۽ ڪوتاهي برداشت نه ڪئي ويندي، جيڪڏهن مون کي به ڪا ادائيگي ڪرڻي آهي ته اها ادائيگي ٿيڻ گهرجي، ديانتدار ۽ فرض شناس آفيسرن جو قومي سطح تي اعتراف ڪيو ويندو. وزيراعظم چيو ته وفاق ۾ اسان جي مخلوط حڪومت آهي، اهڙي طرح صوبن ۾ به عوام حڪومتن کي مينڊيٽ ڏنو آهي، وفاق ۽ صوبن کي گڏجي چئلينجن کي منهن ڏيڻو پوندو. وزيراعظم چيو ته وڏن وزيرن سان به ملاقات ڪندس ۽ پاڪستان کي هڪ عظيم ملڪ بڻائڻ ۽ عالمي دنيا ۾ وڏو مقام ڏيارڻ ۾ وفاق ۽ چئني اڪائين کي گڏجي ڪم ڪرڻو آهي. وزيراعظم چيو ته آءِ ايم ايف به چيو آهي ته ٽيڪس جو دائرو وسيع ڪريون، بجلي ۽ گئس چوري تي زيرو ٽالرنس هوندي جيڪي ماڻهو ٽيڪس نه ٿا ڏين انهن کي ٽيڪس جي دائري ۾ آڻينداسين ۽ اشرافيه ڪلچر جو مڪمل خاتمو ڪرڻو پوندو. اتحادي پارٽين سان گڏوگڏ پارليامينٽ ۾ اهو معاملو کڻي وينداسين ۽ سموريون قانوني گهرجون پوريون ڪيون وينديون. اڳوڻي دور ۾ اسان جيڪو ايس آئي ايف سي جو نظام ٺاهيو آهي ان جي ذريعي سرخ ڦيٿي ۽ رڪاوٽن کي ختم ڪيو ويو. ملڪ ۾ سيڙپڪاري ۾ اضافي ۽ معيشت جي استحڪام لاءِ يڪجهتي سان گڏجي ڪم ڪنداسين.
