اسلام آباد۔21مئی (اے پی پی):پاکستان تے چین وچال ݙو پاسے سفارتی تعلقات دے قیام دی 70 ویں سالگرہ دے موقع تے صدر پاکستان ڈاکٹر عارف علوی اتے چینی صدر شی جن پنگ ݙوہیں ملکاں وچال ݙو طرفہ تعاون کوں مزید پکا کرݨ تے چین پاکستان اقتصادی راہداری (سی پیک) دی ترقی کوں اچے معیار تے ودھارا ݙیوݨ دا اعلان کیتے ۔ ݙوہیں رہنماواں سانجھے خط دا تبادلہ کیتے تے آپݨی آپݨی حکومتاں تے عوام ولوں ھک ݙوجھے کوں مبارخ ݙتی۔ صدر ڈاکٹر عارف علوی اپݨے چینی ہم منصب دے ناں خط اچ آکھیے جو ایں تاریخی موقع تے اساں پاکستان اتے چین دی دوستی کوں نویاں اچائیاں تئیں گھن ونڄݨ تے سانجھے مستقبل دی حامل نیڑے پاک چین کمیونٹی دی تشکیل دے عزم دا اعادہ کریندن ۔انہاں چینی صدر دی چنڳی صحت اتے چین دے عوام دی خوشحالی و ترقی کیتے نیک خواہشات دا اظہار کیتے۔ چین دے صدر شی جن پنگ اپݨے خط اچ آکھیے جو چین اتے پاکستان ہر آزمائش تے پورے لہݨ آلے سٹریٹیجک پارٹنرز ہن جیڑھے جو ہمیشہ بنیادی مفاد اتے وݙی اہمیت دے حامل امور تے ھک ݙوجھے دے رلے کھڑے رہیے ۔انہاں آکھیے جو ݙوہیں ملکاں وچال سانجھے اعتماد اتے دوستی 70 سال توں قائم و دائم اے جیڑھا جو ݙوہیں ملکاں دے عوام دا ساریں توں قیمتی تزویراتی اثاثہ بݨ چکے۔ چینی صدر آکھیے جو اڄوکے سالاں اچ چین اتے پاکستان دیاں سانجھیاں کوششاں توں سی پیک دی تعمیردے حوالے نال شاندار نتائج حاصل تھئن جیڑھے جو ݙوہیں ملکاں دے عوام دے نال نال پورے خطے دی خوشحالی دا اہم محرک ثابت تھیسی ۔ انہاں آکھیے جو کورونا وائرس دی وبا دے خلاف چین اتے پاکستان خلوص دے نال ہک ݙوجھے دی مدد کیتی جیں توں ݙوہیں ملکاں وچال مضبوط دوستی کوں مزید تقویت ملی اے۔ صدر شی جن پنگ آکھیے جو او پاک چین تعلقات دی ترقی کوں ٻہوں اہمیت ݙٰیندن ۔
