واشنگٹن /اسلام آباد۔21جنوری(اے پی پی):میریڈیئن انٹرنیشنل سینٹر دے سی ای او ایمبیسیڈر سٹورٹ ہولیڈے پاکستانی سفیر مسعود خان کوں سینٹر دے دورے دے دوران پاکستان تے امریکا وچال تعلیم، لیڈرشپ تربیتی پروگرام، موسمیاتی تبدیلی، ثقافت اتے کاروبار دے شعبیں اچ نیڑے تعلقات کوں ودھاوݨ اچ مدد دا یقین ݙیوائے ۔ واشنگٹن توں موصولہ اعلامیہ موجب میریڈیئن انٹرنیشنل سینٹر ھک غیر جانبدار ادارہ اے جیڑھا موثر قیادت اتے سفارت کاری دے ذریعے عالمی سلامتی اتے خوشحالی کیتے کم کریندا پئے ۔ اے سینٹرعالمی قیادت دے تبادلیں، تعلیمی پروگراماں تے ٻئے ݙوجھے اقدامات دی شراکت داریاں دے ودھارے کیتے کم کریندے جیڑھا جو ٻئے مسئلیں جیویں سکیورٹی، توانائی، ماحولیات، اقتصادی ترقی، کاروباری مواقع، عالمی صحت اتے ثقافت تے بین الاقوامی تعاون کوں مضبوط بݨیندن ۔ ایں موقع تے پاکستان دے سفیر مسعود خان آکھیے اڄوکے سال پاکستانی طلبا ، پیشہ ور لوک تے ماہرین دے ٻہوں سارے وفد امریکا دا دورہ کیتے تے اے پاکستان اتے امریکا دے درمیان تعلقات دی پائیداری اچ مضبوط پل دا کردار ادا کریسن ۔انہاں آکھیے اساں مزید امریکی طلبا ، ماہرین تعلیم اتے کاروباری لوکاں دا پاکستان آوݨ تے خیر مقدم کریسوں ۔ انہاں آکھیے امریکا پاکستان کیتے ساریں توں وݙی برآمدی منڈی اے تے آوݨ آلے سالاں اچ ݙو پاسے تجارت مزید ودھسی ۔
