اسلام آباد۔20اگست (اے پی پی) وفاقی وزیر برائے منصوبہ بندی، ترقی اتے خصوصی اقدامات احسن اقبال کانسپٹ پیپرز دی تیاری دا کم جلدی توں جلدی پورا کرݨ دی ہدایت ݙیندیں ہوئیں آکھیا جو پاکستان اتے چین سی پیک فیز 2 دے تحت پںج اقتصادی راہداریاں تے جلدی توں جلدی کم شروع کرݨ تے اتفاق کیتے۔ اے ڳالھیں انہاں منگل کوں آپݨی صدارت تھیوݨ آلے سی پیک منصوبیاں بارے جائزہ اجلاس دی صدارت کریندیں ہوئیں آکھی۔ اجلاس اچ سیکرٹری پلاننگ اویس منظور سمرا، متعلقہ وزارتاں دے سیکرٹریز، اداریاں دے سربراہ اتے اعلیٰ حکام شریک تھیے۔ انہاں متعلقہ اسٹیک ہولڈرز اتے وزارتاں دے اعلیٰ حکام کوں انہاں کوریڈورز تے سانجھا پلان ٻݨاوݨ دی ہدایت کیتی۔ وفاقی وزیر آکھیا جو سارے ورکنگ گروپس کوں اگست 2023 اچ چین دے صدر دی جن پنگ دے تجویز تھیے 5 کاریڈورز تے کنسپٹ پیپرز ٻݨاوݨ دی ہدایت ݙتی ڳئی ہئی۔ حکومت پاکستان اتے چین سی پیک فیز ٹو دے تحت انہاں پںج اقتصادی راہداریاں تے جلدی کم شروع کرݨ تے اتفاق کیتے۔ احسن اقبال آکھیا جو پںج نویں کاریڈورزاچ گروتھ، اکنامک ڈویلپمنٹ پروجیکٹس، انوویشن، گرین، اتے ریجنل کنیکٹیویٹی شامل ہن، اے پنجیں کوریڈورز پاکستان دے اقتصادی ترقی دے فریم ورک “فائیو ای ایز” نال ملدن۔ انہاں آکھیا جو انوویشن کاریڈور دے تحت جدید ٹیکنالوجی نال نویں مںصوبے اتے نینگراں کوں آئی ٹی اچ مہارت ݙیوݨ شامل اے۔ اوپن ریجنل کوآپریشن دے تحت سی پیک کوں سنٹرل ایشیا نال رابطے دے ودھارے اتے دوستانہ تعلقات ٻݨاوݨ کیتے استعمال کیتا ویسی۔ وفاقی وزیر منصوبہ بندی آکھیا جو پنجیں کوریڈورز بارے پاکستان دے ہوم ورک بارے ٻݨائی ڳئی دستاویز چین دے وزیراعظم دے دورہ پاکستان اچ پیش کیتی ویسی۔ احسن اقبال آکھیا جو ساری وزارتاں پندراں ݙینھ اچ سی پیک دے باقاعدہ پلان ٻݨا تے پیش کرن۔ سانجھے ورکنگ گروپ دے ایجنڈے اتے مجوزہ منصوبیاں دے انتخاب کیتے ہفتہ وار میٹنگز کرائی ونڄن۔ انہاں آکھیا جو اساکوں نہ صرف آپݨا پنڄ سال دا منصوبہ ٻݨاوݨا چاہیدے بلکہ چین دے سی پیک فیز 2 دے منصوبے دی پوری تفصیل پتہ ہووݨی چاہیدی اے۔ نویں آئیڈیاز تے منصوبے ٻݨائے ونڄن۔ اگلے مشترکہ ورکنگ گروپ اتے جے سی سی دے اجلاس کیتے مجوزہ منصوبیاں تے کم جلدی پورا کیتا ونڄے۔
